Bikaintasun zientifikoaren Severo Ochoa zigilua jaso du DIPCk

Donostia International Physics Center-ek (DIPC) bikaintasun zientifikoaren “Severo Ochoa” zigilua jaso du gaur Zaragozan egindako ekitaldi batean. Ziurtagiri horri esker, talentua erakarri eta datozen urteetan ikerketa estrategikoko ildoak garatu ahal izango ditu.

Zientzia, Berrikuntza eta Unibertsitate Ministerioak ematen ditu bikaintasun zientifikoaren zigilu horiek, Ikerketako Estatu Agentziaren (IEA) bitartez, eta helburua da finantzaketa eta akreditazioa ematea, edozein arlo zientifikotan, nazioartean inpaktu eta lidergo zientifikoa dutela eta beren gizarte- eta enpresa-ingurunearekin aktiboki kolaboratzen dutela frogatzen duten ikerketa-zentro eta -unitateei. Mugako ikerketa-programak dituzten eta arlo zientifikoan munduko onenen artean dauden antolaketa-egiturei ematen zaie.

Azken deialdi horretan, 8 zentrok “María de Maeztu Bikaintasun Unitatea” akreditazioa eta 9k “Severo Ochoa Bikaintasun Zentroa” akreditazioa lortu zuten, eta horien artean dago DIPC.

Akreditazio berri honekin, Euskal Autonomia Erkidegoko BERC eta CIC bikaintasun-zentroak, “Severo Ochoa” eta “María de Maeztu” zigiluak dituztenak, 7ra iritsi dira lurralde osoan. Gipuzkoa gune zientifiko gisa finkatu da, DIPC eta BCBL “Severo Ochoa” bikaintasun-zentro gisa hartuta, eta CIC nanoGUNE eta Polymat “María de Maeztu” bikaintasun-unitate gisa hartuta; ondoren, Bizkaia dago, “Severo Ochoa” zigilua baitute CIC bioGUNE eta BCAM zentroek, eta “María de Maeztu” zigilua, berriz, BC3k.