Eduardo Sáenz de Cabezón Kuantikaz blai!- ¡Empápate de cuántica! zikloan izango da

Zientziaren eta Teknologia Kuantikoen Nazioarteko Urtea dela eta, Kutxa Fundazioak eta Donostia International Physics Center-ek (DIPC) “Kuantikaz blai! – ¡Empápate de cuántica!” hitzaldiekin jarraituko du Tabakaleran. Zikloaren bigarren hitzordua irailaren 2an izango da, Kutxa Fundazioa Kluba aretoan, Tabakalera eraikineko 1. solairuan, eta Eduardo Sáenz de Cabezón matematikari, irakasle eta dibulgatzaile zientifiko ezagunak hartuko du parte. “Manotazos en una habitación oscura. La llegada de la computación cuántica” ("Esku-zartakoak gela ilun batean. Konputazio kuantikoaren etorrera") izenburua duen hitzaldian, bere estilo argi eta hurbilarekin gure garaiko erronka zientifiko eta teknologiko handienetako bati helduko dio: konputazio kuantikoari.

David Deutsch, Richard Feynman eta beste batzuk fisika kuantikoaren legeetan oinarritutako konputazio-mota berri bat garatzeko aukera planteatu zutenetik, lau hamarkada baino gehiago igaro dira. Gaur egun, konputazio kuantikoak etorkizun gero eta begi-bistakoagoa du, aukerez (eta ziurgabetasunez ere) betea. Gertu ote gaude itsumutsuka miatzen dugun “gela ilun” horretan argia piztetik? Prest al gaude ekarriko duenerako?

Eduardo Sáenz de Cabezón Teologian lizentziaduna eta Matematikan doktorea da, eta irakasle titularra Errioxako Unibertsitateko Matematika eta Konputazio Sailean. Bere ikerketa aljebra konputazionalaren arloan garatzen du. Batez ere matematikaren dibulgazio zientifikoan egindako lanagatik da ezaguna Sáenz de Cabezón. The Big Van Theory monologogile zientifikoen taldearen sortzaileetako bat izateaz gain, gidoilaria eta aurkezlea ere bada Derivando youtubeko kanalean. Órbita Laika (La2, RTVE) programaren aurkezlea eta zenbait dibulgazio-libururen egilea ere bada.

Hitzaldia Kutxa Fundazioak eta Donostia International Physics Center-ek (DIPC) antolatutako hitzaldi-zikloaren parte da. Zikloaren helburua da fisika kuantikoaren berezitasunak modu errazean zabaltzea eta bizitzen ari garen "bigarren iraultza kuantikoa" deritzona gizarteari hurbiltzea teknologia kuantikoen garapenak eskaintzen dituen aukerak eta abantailak ezagutzera emanez. Sarrera doakoa da, edukiera bete arte.