Salvator Mundiren misterioatik unibertsoaren sekretuetara: DIPC EHUren Zientzia Astean

Zer erakuts dezake zientziak historiako pintura enigmatikoenetako bati buruz? Zertaz dago osatuta unibertsoa? Eta nola azter ditzakegu inguruan ditugun materialen propietateak? DIPCk galdera horiei eta beste askori erantzunak bilatzera gonbidatzen gaitu EHUren Zientzia Astean. Horretarako, dibulgaziozko topaketa, tailer eta esperientzia ugari antolatu ditu Bilbon eta Donostian.

Salvator Mundi: artea eta zientzia elkartzen direnean

"Salvator Mundi zientziaren ikuspegitik" jarduerak Dianne Modestini New Yorkeko zaharberritzaile ospetsua eta Juan Manuel García-Ruiz kristalografoa, DIPCko Ikerbasque irakaslea, bilduko ditu Bilbon eta Donostian. Biek Leonardo da Vinciri egozten zaion margolan ospetsu honen zaharberritzeari buruzko ikuspegiak partekatuko dituzte, eta elkarrekin egindako ikerketa bat aurkeztuko dute. Ikerketa margolaneko xehetasun intrigazkoenetako batean oinarritzen da: irudian agertzen den pertsonaiak eskuetan duen kristalezko esfera. Aukera paregabea izango da zientziak artelan baten interpretazioari buruzko gako berriak nola eman ditzakeen ezagutzeko, baita haren sekretuak ikertzeko bide berriak zabaltzeko ere.

• Azaroak 6, ostirala (12:00) – Bilboko Arte Ederren Museoa
• Azaroak 7, larunbata (11:30) – Tabakalera, Donostia

Zertaz dago osatuta unibertsoa? Fisika zuzenean

Esperimentatuz ikasi nahi dutenentzat, DIPCk "Izpi kosmikoak eta oinarrizko partikulak" tailerra proposatzen du. Publiko guztiei zuzendutako dibulgazio-jarduera honetan, zentroko Partikulen Fisikako taldeak parte hartuko du. Bi gailu harrigarriren bidez egingo diren esperimentuen bitartez —Van de Graaff sorgailua eta laino-ganbera—, parte-hartzaileek fisikaren oinarrizko kontzeptuetara hurbiltzeko aukera izango dute. Halaber, begi hutsez ikusi ezin ditugun arren unibertsoa ulertzen laguntzen diguten fenomenoak ezagutuko dituzte.

Tailerra gaztelaniaz egingo da Tabakaleran, bi saiotan:

• Azaroak 6, ostirala (17:00) – Tabakalera, Donostia. Aurrez izena eman behar da
• Azaroak 7, larunbata (16:00) – Tabakalera, Donostia. Aurrez izena eman behar da

Materialen zientzia, familian ezagutzeko

Tradizioa jarraituz, CIC nanoGUNE, Materialen Fisika Zentroa (CFM CSIC-EHU), POLYMAT eta DIPC ikerketa-zentroek bat egingo dute Donostian, Zientzia Astean klasiko bihurtu diren bi proposamen eskaintzeko: "Materialen munduan barrena" txokoa eta "Eskalatu zure mundua" tailerra. Bi jarduerek jakin-minaren eta esperimentazioaren bidez zientzia ezagutzera gonbidatzen dute, adin guztietako publikoari materialen mundu liluragarria hurbilduz eta familia giroan zientziaz gozatzeko aukera eskainiz.

"Materialen munduan barrena" txokoak ikastetxeak hartuko ditu, eta publiko orokorrarentzat ere irekita egongo da ordutegi honetan:

• Azaroak 6, ostirala (17:00–19:00) – Tabakalera, Donostia
• Azaroak 7, larunbata (10:00–14:30 / 16:00–19:00) – Tabakalera, Donostia

"Eskalatu zure mundua" tailerra 3 eta 10 urte bitarteko haurrei zuzenduta dago, eta saio elebidun bakarra eskainiko da:

• Azaroak 7, larunbata (12:15) – Aurrez izena eman behar da.

Izen-emateak eta egitarau osoa

Tailerretan parte hartzeko, aurrez izena eman behar da. Izen-ematea urriaren 26tik aurrera egongo da eskuragarri Zientzia Astearen webgunean.

Donostiako egitaraua jarduera ugarirekin, ibilbide didaktikoekin eta publiko guztientzako proposamenekin osatuko da. Kontsultatu Donostiako Zientzia Astearen webgunea xehetasun guztiak ezagutzeko eta bisita antolatzeko.